Carpon

Pangarang Kasohor

Langit caang narawangan, taya méga anu ngahalangan. Pantes pisan saenyana saupama dipaké leuleumpangan bari ngadagoan panonpoé surup.

Editor: Hermawan Aksan
Tribun Jabar
Ilustrasi Carpon Ombak Laut 

“Atos?”

“Sakedik deui,” cénah bari tuluy ngabamblam.

Didagoan sakeudeung. Angger teu réngsé waé. Jurig téh! Rét kana jam tangan. Kuring beuki élékésékéng. Leungeun garo-garo teu ateul. Tapi ieu mangkeluk teu surti saeutik-eutik acan. Tuluy wé ngabamblam. Malah kalah beuki pogot.

“Heup wé heula, nya. Énjing teraskeun,” kuring motong.

“Ké pameng, Kang.” Tuluy ngocoblak deui.

Geus teu kuat hayang nyingkah. Didagoan deui sakeudeung. Panon hideng ngarérét kana jam tangan. Geus ampir satengah jam.

“Kumaha, atos?”

“Kéla Kang sanggem abdi gé. Kapameng pisan, ieu téréh bérés.” Beuki rusuh manéhna nyarita. Geus teu puguh titik koma. Malah teu ngarandeg-randeg acan.

Nyel keuheul. Tuluy disanghareupan mah aing bisa setruk ngadadak! Lila-lila teuing si koplok téh ngadongéngna!

“Tah, kitu Kang. Saur Akang, éta pinoveleun téh naha mending nganggo galur bobok tengah atanapi galur mérélé? Sareng deuih abdi téh ngarasa aya nu teu acan pas lebah konflikna. Asa aya nu leungit. Duka naon. Kumaha numutkeun Akang? Teras deuih éndingna, saéna mend ing kumaha? Naha mending digantung, atanapi ditémbrakkeun? Naha mending énding sedih atanapi senang?”

“Éndingna mah kieu wé,” témbal téh bari geus teu kawawa ambek. Leungeun sakilat mukakeun panto tukang.

“Blékih!”

Gajleng anjing pitbul badag luncat. Manéhna katempo reuwas. Anjing nyanggéréng. Beretek manéhna lumpat. Si blékih sakilat ngudag.

***

AYA ku kabeneran hadé poéna pasosoré téh. Langit caang narawangan, taya méga anu ngahalangan. Pantes pisan saenyana saupama dipaké leuleumpangan bari ngadagoan panonpoé surup. Tapi soré harita mah kuring kalah ka urusan jeung pulisi, gara-gara ngahucuhkeun anjing nu can diparaban. Cénah bujur éta lalaki téh tatuna parna pisan.

***

Sumber: Tribun Jabar
  • Berita Populer
    Ikuti kami di
    KOMENTAR

    BERITA TERKINI

    berita POPULER

    © 2022 TRIBUNnews.com Network,a subsidiary of KG Media.
    All Right Reserved